Шәкәрім университетінің ректоры Думан Орынбековтің Бұқаралық ақпарат құралдары қызметкерлері күніне арналған құттықтауы

Құрметті журналистер, редакторлар, операторлар, фотографтар, бұқаралық ақпарат құралдарының қадірлі өкілдері!

Шәкәрім университеті ұжымы атынан баршаңызды кәсіби мерекелеріңіз – Қазақстан Республикасы Бұқаралық ақпарат құралдары қызметкерлері күнімен шын жүректен құттықтаймын!

Экономиканы өркендететін, қалалар тұрғызатын, адам өміріне араша түсетін, ұрпақ тәрбиелейтін мамандықтар бар. Ал қоғамдық сананы қалыптастыратын, елдің ой-өрісіне ықпал ететін ерекше мамандық – ол журналистика.

Сіздер күн сайын қоғам нені білуі керек екенін, қай оқиғаның көпшілік назарында болатынын, қандай мәселенің көтеріліп, қандай ойдың елге жететінін айқындайсыздар. Сіздердің сөздеріңіз адамдарды жақындастырады, сенімді нығайтады, қоғамдық пікірді қалыптастырады және елдің дамуына қызмет етеді.

Көп жағдайда біз журналисті телеэкраннан, газет бетінен немесе ақпараттық порталдардан ғана көреміз. Алайда шынайы бұқаралық ақпарат құралы – бір адамның емес, тұтас шығармашылық ұжымның маңдай тері мен кәсіби еңбегінің жемісі.

Әрбір телехабардың, газет бетінің, фотосуреттің, бейнематериалдың артында есімі көпшілікке беймәлім ондаған маманның қажырлы еңбегі жатыр. Операторлар мен фотографтар, редакторлар мен корректорлар, монтаж режиссерлері, дыбыс режиссерлері, дизайнерлер, продюсерлер және техникалық қызметкерлер – барлығы ақпараттың сапалы, жедел әрі шынайы болуы жолында күн сайын аянбай еңбек етеді.

Сондықтан осы айтулы мереке күні ақпарат кеңістігінің сапасын қалыптастырып жүрген, есімі көпшілікке жиі таныла бермейтін әрбір маманға айрықша алғысымды білдіремін.

Бүгінде ақпараттық кеңістік бұрын-соңды болмаған қарқынмен өзгеріп келеді. Осындай уақытта журналистің дәлдігіне, объективтілігіне және кәсіби адалдығына қойылатын талап бұрынғыдан да күшейе түсті. Сондықтан сіздердің еңбектеріңіз бен жауапкершіліктеріңіз бүгінгі қоғам үшін бұрынғыдан да маңызды.

Абай жерінде журналист мамандығының орны қашанда ерекше болған. Бұл өлкеде сөздің қадірі ешқашан кеміген емес.

Абай өз сөзі арқылы қоғамды тәрбиелеп, адамның ар-ұжданына үн қатты. Шәкәрім адамдық қасиетті, ар мен әділетті сөз құдіреті арқылы қорғады. Ал Алаш қайраткерлері – Әлихан Бөкейхан, Ахмет Байтұрсынұлы, Міржақып Дулатұлы, Жүсіпбек Аймауытов – мемлекет және қоғам қайраткерлері, ғалымдар ғана емес, өз дәуірінің көрнекті публицистері, газет редакторлары, ұлт санасын оятқан қайсар қаламгерлер болды. Олар халықтың санасын өзгертетін ең ұлы күш – әділ де шынайы сөз екенін терең түсінді.

Сондықтан Абай жерінде сөз бүгін де жай ғана ақпарат жеткізудің құралы емес. Ол – қоғам алдындағы жауапкершілік. Тарих алдындағы жауапкершілік. Болашақ ұрпақ алдындағы жауапкершілік.

Осы себепті Шәкәрім университеті үшін бұқаралық ақпарат құралдарымен қалыптасқан көпжылдық әріптестік ерекше құндылыққа ие. Сіздердің кәсібиліктеріңіздің арқасында еліміздің жұртшылығы университетіміздің оқытушылары, ғалымдары мен студенттерінің жетістіктері, ғылыми жаңалықтары, білім беру жобалары, халықаралық бастамалары және университет өміріндегі маңызды өзгерістер туралы жан-жақты әрі шынайы ақпарат алып келеді.

Біз үшін сіздердің тек жаңалық таратып қана қоймай, оның мәні мен маңызын қоғамға терең түсіндіріп, ғылымның, білімнің және жасампаз еңбектің құндылығын кеңінен насихаттауларыңыз аса маңызды.

Ашық диалогты, кәсіби кері байланысты, объективті ұстанымды және ғылым мен білімнің дамуына деген шынайы жанашырлықтарыңызды жоғары бағалаймыз.

Меніңше, университеттер мен бұқаралық ақпарат құралдарын бір мақсат тоғыстырады. Ол – білімге негізделген, жауапкершілігі жоғары, өзара сенімге сүйенетін әрі жасампаз қоғам қалыптастыру арқылы еліміздің болашағына қызмет ету.

Көп жылдар бойғы қолдауларыңызға, университет өміріне деген тұрақты қызығушылықтарыңызға, әділ көзқарастарыңызға, кәсіби ұстанымдарыңызға және мамандыққа деген адалдықтарыңызға шынайы ризашылығымды білдіремін.

Жариялаған әрбір материалыңыз оқырман мен көрерменнің жүрегіне жол тауып, қоғам игілігіне қызмет етсін. Әрбір жазған сөздеріңіз ел ішіндегі сенімді нығайтып, кәсіби шеберліктеріңіз, азаматтық ұстанымдарыңыз және журналистиканың асыл қағидаттарына деген адалдықтарыңыз әрдайым өздеріңізге темірқазық болсын.

Баршаңызға зор денсаулық, шығармашылық шабыт, сарқылмас қуат, тың жобалар, жарқын репортаждар, ризашылығы мол аудитория, жаңа кәсіби белестер және ел құрметіне бөленетін толайым табыс тілеймін!

Мерекелеріңіз құтты болсын!

Құрметпен, Думан Орынбеков