Шәкәрім университетінің ректоры Думан Орынбековтің Құрбан айт мерекесіне арналған құттықтауы
Құрметті оқытушылар мен қызметкерлер, студенттер, Shakarim College және Shakarim High School білім алушылары, қадірлі ата-аналар!
Сіздерді мұсылман жұртының ең ұлық мерекелерінің бірі – қасиетті Құрбан айт мейрамымен шын жүректен құттықтаймын!
Құрбан айт – адамзатты мейірім мен ізгілікке үндейтін, рухани тазалық пен жан жылуын дәріптейтін ерекше мейрам. Бұл күн халқымыздың сан ғасырлық дәстүрімен сабақтасып, үлкенге құрмет, кішіге қамқорлық көрсету, мұқтаж жанға қол ұшын созу секілді асыл қасиеттерді ұлықтайды.
Айт мерекесі адамдарды татулық пен өзара сыйластыққа топтастырып, отбасылық құндылықтарды нығайтады. Адамды шүкіршілікке, барды бағалауға, қуанышын өзгемен бөлісе білуге тәрбиелейді. Осындай рухани құндылықтардың бүгінгі қоғам үшін де, жас ұрпақ тәрбиесі үшін де маңызы айрықша.
Білім ордасы – тек кәсіби білім мен ғылымның мекені ғана емес, адамгершілік пен парасаттың, мәдениет пен жауапкершіліктің қалыптасатын ортасы. Университетте, колледжде және мектепте жас буынның бойына біліммен қатар елге қызмет ету, адамды құрметтеу, адал еңбек ету секілді өмірлік ұстанымдар сіңіріледі.
Бүгінде еліміз жаңғыру мен дамудың жаңа кезеңіне қадам басып келеді. Қазақстанның болашағы – білімді, бәсекеге қабілетті әрі рухани бай ұрпақтың қолында. Сондықтан ғылым мен білімді дамыту, сапалы маман даярлау, адами капиталды нығайту жолында рухани тұтастық пен өзара сенімнің орны ерекше.
Құрбан айт мерекесі әрбір жетістіктің бастауы адамның ниетінде, ізгі амалында және айналасына деген жанашыр көзқарасында екенін тағы бір мәрте еске салады.
Осы қасиетті мереке әр шаңыраққа құт-береке, ынтымақ пен молшылық әкелсін!
Әр отбасына зор денсаулық, бақ-береке, шаттық пен тыныштық тілеймін.
Жүректеріңізге иман нұры ұялап, әр күніңіз жақсылық пен қуанышқа толы болсын!
Құрбан айт қабыл болсын!
Құрметпен, Думан Орынбеков
