Ядролық қауіпсіздік мәселелері жөніндегі халықаралық форум
2026 жылғы 23-25 қыркүйек аралығында Shakarim University базасында ядролық қауіпсіздікті ілгерілетуге, атом энергиясын бейбіт мақсатта пайдалануға және өңірлік ынтымақтастықты дамытуға арналған Women in Nuclear Central Asia (WINCA) желісінің жыл сайынғы кездесуі – Semey Forum 2026 халықаралық форумы өтті.
Форум Орталық Азия елдері мен басқа да мемлекеттердің сарапшыларын, ғалымдарын, халықаралық ұйымдардың, жоғары оқу орындарының және кәсіби қауымдастықтардың өкілдерін біріктірді.
Халықаралық эссе байқауының қорытындысы бойынша «Техникалық физика және жылу энергетикасы» кафедрасының аға оқытушысы Ақбота Хажидинова бірінші орынға ие болды. Байқауға ұсынылған жұмыс мазмұндылығы, терең талдауы және ядролық қауіпсіздік, ядролық технологияларды бейбіт мақсатта пайдалану мен өңірлік ынтымақтастық саласындағы ұсынылған идеялардың өзектілігі үшін жоғары бағаланды.
«Техникалық физика» білім беру бағдарламасының бірінші курс студенті Мадияр Маратбековтің форумға қатысуы ерекше назар аударуға тұрарлық. Ол оқуының алғашқы жылынан бастап ядролық энергетиканың өзекті мәселелеріне қызығушылық танытып, халықаралық сарапшылық алаңның жұмысына қатысу мүмкіндігіне ие болды. Отандық және шетелдік жетекші мамандардың баяндамаларымен танысу жас қатысушының кәсіби дамуы мен ғылыми дүниетанымын кеңейтудегі маңызды қадам болды.
«Техникалық физика және жылу энергетикасы» кафедрасы оқытушысы мен студентінің Semey Forum 2026 форумына қатысуы ғылыми қызығушылықтардың сабақтастығын және білім алушылардың бірінші курстан бастап кәсіби ортаға белсенді тартылуын көрсетеді.
Форумның өткізілуі және университет өкілдерінің қатысуы БҰҰ-ның Тұрақты даму мақсаттарын (ТДМ) іске асыруға ықпал етеді:
– ТДМ 4 «Сапалы білім беру» – білім беру мүмкіндіктерін кеңейту, кәсіби құзыреттерді дамыту және студенттерді халықаралық ғылыми-білім беру ынтымақтастығына тарту;
– ТДМ 5 «Гендерлік теңдік» – ядролық саладағы әйелдердің кәсіби және ғылыми әлеуетін қолдау, олардың ғылымдағы, технологиялардағы және инженерлік білім берудегі рөлін арттыру;
– ТДМ 7 «Қолжетімді және таза энергия» – тұрақты энергетикалық дамудың бағыттарының бірі ретінде атом энергиясын қауіпсіз әрі бейбіт мақсатта пайдалану мәселелері бойынша ғылыми диалогты дамыту;
– ТДМ 17 «Тұрақты даму мақсаттарына қол жеткізу жолындағы әріптестік» – университеттер, ғылыми ұйымдар және кәсіби қауымдастықтар арасындағы халықаралық және өңірлік ынтымақтастықты нығайту.
Semey Forum 2026 ядролық қауіпсіздік және атом энергиясын бейбіт мақсатта пайдалану саласындағы кәсіби диалог, тәжірибе алмасу және халықаралық ынтымақтастықты нығайту үшін маңызды алаңға айналды. Shakarim University өкілдерінің қатысуы университеттің ғылыми әлеуетті дамытуға, жас зерттеушілерді қолдауға және тұрақты даму қағидаттарын ілгерілетуге ұмтылысын айқындайды.
