Шәкәрім университетінің ректоры Думан Орынбековтің Археологтар күніне орай құттықтауы
Құрметті археологтар, қадірлі ғалымдар мен зерттеушілер!
Сіздерді кәсіби мерекелеріңіз – Археологтар күнімен құттықтаймын!
Археология – уақыттың үнін тыңдап, топырақ қойнауында қатталған тарихтың сырын ашатын, ұлттың өткені мен бүгінін сабақтастыратын аса маңызды ғылым. Сіздердің табандылық пен терең ізденісті талап ететін еңбектеріңіздің арқасында халқымыздың сан ғасырлық тарихының көмескі беттері жаңғырып, ата-бабамыздың өркениеті мен мәдениетінің асыл мұралары ғылыми айналымға енуде.
Археолог – өткеннің үнін бүгінге жеткізетін, тарихтың жоғалған ізін жаңғыртатын маман. Сіздердің әрбір қазба жұмыстарыңыз бен ғылыми зерттеулеріңіз – ұлт тарихына қосылған құнды үлес, келер ұрпаққа аманат болар рухани қазына.
Шәкәрім университеті ғылым мен білімді ұштастыра отырып, отандық ғылымның дамуына және білікті мамандар даярлауға әрдайым айрықша мән береді. Осы орайда университетіміздің Ә.Х. Марғұлан атындағы Археология институтымен бірлескен ғылыми-зерттеу жұмыстарының орны ерекше. Археологиялық зерттеулерді дамыту, жас ғалымдар мен студенттердің ғылыми ізденістерге белсенді араласуына мүмкіндік жасау, олардың кәсіби тәжірибесін жетілдіру – ортақ мақсатымыздың маңызды бағыттарының бірі.
Бүгінде археология ғылымы жаңа технологиялармен, тың әдістермен толығып, тарихты танудың жаңа мүмкіндіктерін ашуда. Осы игі үдерісте сіздердің кәсіби білімдеріңіз бен ғылыми ізденістеріңіз, ел тарихына деген адалдықтарыңыз бен еңбексүйгіштіктеріңіз айрықша маңызға ие.
Осынау айтулы күні баршаңызға мықты денсаулық, отбасыларыңызға амандық, шығармашылық шабыт пен толағай табыс тілеймін! Ғылыми сапарларыңыз сәтті, ізденістеріңіз нәтижелі, жаңалықтарыңыз жарқын болсын. Ұлы дала төсінен табылған әрбір жәдігер ұлт тарихының жаңа парағын ашып, еңбектеріңіз ел игілігіне қызмет ете берсін!
Ұлт тарихын түгендеу жолындағы абыройлы еңбектеріңіз жемісті болсын!
Археологтар күні құтты болсын!
Құрметпен, Шәкәрім университетінің ректоры
Думан Орынбеков
